AudiotourԵրևանի մետրոպոլիտեն

Մետրոպոլիտեն բառը առաջացել է հունարեն «մետրոպոլիս» բառից, որ նշանակում է «գլխավոր քաղաք, մայրաքաղաք»: Առաջին մետրոն կառուցվել է ավելի քան հարյուր տարի առաջ Անգլիայի մայրաքաղաք Լոնդոնում : Մետրոն քաղաքային տրանսպորտի ամենահարմար, ամենաարագընթաց և ամենահուսալի տեսակն է: Հարյուրավոր ուղևորներ շտապում են իրենց գործին, հանգիստ զրուցում են, գիրք կամ թերթ կարդում և ոչ ոք չի վախենում, թե կուշանա: Մետրոյի գնացքին չեն խանգարում ոչ փողոցների խաչմերուկները, ոչ ավտոմեքենաները, ոչ հետիոտները: Այն շարժվում է խորը գետնի տակ փորված թունելով : Մետրոպոլիտենի անհրաժեշտությունը հիմնականում զգացվում է մեկ միլիոն և ավելի բնակչություն ունեցող քաղաքներում :
Գեղեցիկ է Երևանյան մետրոն: Հայկական շինարվեստին բնորոշ հատուկ զուսպ ոճով կառուցված կայարաններն ու նախասրահները երեսպատված են հայկական բազմապիսի ու բազմագույն քարատեսակներով` տուֆերով, մարմարներով, գրանիտով`զարդարված հարթաքանդակներով :
Երևանի մետրոպոլիտենի շինարարությունն սկսվել է 1972թ. և նախագծվել է Հայպետտրանս նախագիծ և Երևան նախագիծ ինստիտուտներում: Մետրոպոլիտենը շահագործման է հանձնվել 1981 թ. մարտի 7-ին և աշխատել 5 կայարանով: Երևանի մետրոպոլիտենը 1999թ. անվանակոչվել է հայ պետական-քաղաքական գործիչ Կարեն Դեմիրճյանի անունով: Մետրոպոլիտենի կառուցումն ու ընդլայնումը կատարվել է Կարեն Դեմիրճյանի ղեկավարության օրոք և նրա գլխավորությամբ: 1988-ի կործանարար երկրաշարժը դարձավ մետրոպոլիտենի ընդլայնման աշխատանքների դադարեցման գլխավոր պատճառներից մեկը` դադարեցվեցին Աջափնյակ և Դավիթաշեն թաղամասերում մետրոյի կայարանների կառուցման աշխատանքները, քանի որ Հանրապետության ամբողջ շինարարական ռեսուրսները ուղղվել էր ավերված շրջանների վերականգնմանը: