Musée Меморијален музеј АСНОМ, село Пелинце, општина Старо Нагоричане

Меморијален центар АСНОМ во село Пелинце, општина Старо Нагоричане - единствен спој на култура и природа

Меморијален центар АСНОМ се наоѓа во општина Старо Нагоричане покрај реката Пчиња на околу триесетина километри од градот Куманово и на шеесет и пет километри од главниот град Скопје. На ова место посетителите можат да уживаат во прекрасната природа и многуте интересни содржини што комплексот ги нуди, како на пример: традиционален ресторан, паркинзи за автомобили, спортски игралишта, детски катчиња и најзначајниот објект - Меморијален музеј АСНОМ (Антифашистичко собрание за народно ослободување на Македонија). 

Прекрасниот музеј (дел од комплексот АСНОМ) е посветен на Првото заседание на АСНОМ коешто се одржало на 2 август 1944 год. во манастирот Прохор Пчински во соседна Србија.  Во музејот се наоѓа автентична копија на оригиналната соба во манастирот Прохор Пчински каде што се одржало првото заседание. Посетителите можат да видат фотографии и документи коишто сведочат за создавањето на македонската држава во федерација со другите југословенски народи. Ѕидот на влезот на музејот го краси ремек делото на познатиот македонски уметник Рубенс Корубин и неговите студенти од Факултетот за ликовни уметности во Скопје. 

Меморијалниот музеј е официјално отворен на 2 август 2004 година по повод шеесет години од Првото заседание на АСНОМ. Тој има големо историско значење за нашата држава. Првата македонска држава беше официјално прогласена под името Демократска Федерална Македонија како и македонскиот јазик за службен јазик. Меморијалниот центар беше изграден во 2004 год. според проектот на македонскиот архитект Георги Константиновски и претставува една од најпосетените дестинации од домашните и странски туристи на културната мапа на Северна Македонија.