Audio tour Suu camin deus grans Òmis e de las granas Hemnas de Baiona

Durada : 2h
Tèxtes e lectura preu : Miquèu Baris
Credit fotografic : Miquèu Baris e Andrèu Lajeus
Colleccion de cartas postaus ancianas deu Lionel Andia
Un partenariat : IEO, IEO 40, Camille Jautrou (Servici civic IEO - FFCU)

Visita possibla en francés e en occitan (gascon).
Endé nos har saber çò que pensatz de la visita,empleatz lo nòste questionari de satisfaccion.

Itinerari : lo Pont Major, la plaça de la Libertat, la Mairetat e lo teatre, l’arrua Ducéré, l’arrua Lormand, l’arrua Victor-Hugo, la plaça deus Cinc-Cantons, las arruas Guilhamin e Pòrt-de-Susèia, l’arrua Bernadon, l’Ostau de Cohúa o las Halas, l’arrua Pòrt-de-Bertàco e l’ostau Molís, lo canton de l’arrua de la Salia e l’Ostau de Belsunça, lo canton de las arruas Peishoneria, deus Augustins e Gòssa (e la maison de l’Arribèira), l’arrua Peishoneria, la plaça Bernat de Lacarra.

Aquesta visita de Baiona que's pòt completar dab la visitas de Sent-Eperit e deu Petit Baiona (las visitas que son tanben disponiblas en francés.)

*******  Presentacion dab lo Miquèu Baris

Qu’atz aquí un purmèr libròt qui’vs va perméter de’vs passejar dens Baiona en descobrint las riquessas de la soa istòria e deus sons grans òmis e de las soas granas hemnas. N’estón pas tots gascons, segur, mes aquò rai, qu’an contribuit a la renomada d’ua ciutat multiculturau, que n’oblidan a bèths còps la memòria : gascons o vascons, bascos, judius, portugués, espanhòus, anglés… que t’ac sèi jo ?

Aqueth libròt, l’ideia que me’n vienó au parat deu purmèr Hestenau Gascon de Baiona, en julhet de 2010. Que l’èi realizat shens nat mejan… abans que ne’m panin lo trabalh de recèrca e de documentacion que m’a calut hornir.

Que’m cau mercejar totun tots los qui m’an ajudat e encoratjat dens aquera realizacion : en purmèr l’associacion « Ací Gasconha », dab lo president Bernat Dauga, e tots los aprenents deus cors de gascon deu Baish-Ador, qui an cercat dab jo, particularament los d’Anglet, mes tanben los d’Ondres e los de Sent-Martin-de-Senhans. Qu’èm luenh d’aver acabat la nòsta recèrca, ne hè pas sonque començar !...

Un mercés especiau a l’Andrèu Lajeus, d’Ondres, tròp lèu desapareishut a l’estiu 2018, tà la soa collècta fotografica e tà la maqueta de la carta gascona de Baiona, e a l’Edoard Ducéré, que lo son libe Diccionari istoric de Baiona e m’a servit de basa de trabalh, e aus amics confrairs e consòrs de l’Academia Gascona de Baiona de m’aver deishat horrucar dens la soa bibliotèca de l’arrua deu Molin quauques tesaurs completament desbrombats.

Mercés enfin a un… neozelandés, l’Andí Fisher, guida de l’Ofici de Torisma de Baiona, apassionat de l’istòria de la soa vila d’adopcion, tà tot çò qui m’a permetut de descobrir…

N’augitz pas paur, d’auts libròts que seguiràn. Un gascon, quan e’u balhan un òs ad arroganhar, que se’u chuca dinc au medoth, e medish quan e’s pensa que ne n’i a pas mei, que se’n tròba enqüèra…

(C) IEO - Tots drets reservats / Tous droits réservés