Audio tour UNESCO Vëlos-Tour

Zanter 1994 stinn d’Festungswierker vun der Stad Lëtzebuerg an hir al Quartieren op der Lëscht vum Patrimoine mondial vun der UNESCO.

D’UNESCO-Promenad zu Fouss, genee wéi dësen Tour mam Vëlo, erlaben et, de Site mat senge schéinsten Attraktiounen an 90 Minutten ze entdecken.

D’UNESCO consideréiert d’Stadbild vu Lëtzebuerg als en aussergewéinlechen urbanisteschen Ensembel. An der Landschaft kann ee kloer déi verschidde signifikant Bauperioden aus der Geschicht identifizéieren. « Déi eeler Staddeeler a Festungspartië vu Lëtzebuerg leien an engem eenzegaartege Raum an erënneren un déi ursprünglech Festungsstad. Lëtzebuerg, dat ëm 963 gegrënnt gouf, huet während Joerhonnerten eng wichteg Roll an der europäescher Geschicht gespillt » liest een am Rapport vun der 18. Sessioun vum Comité pour le patrimoine mondial, dee sech vum 12. bis de 17. Dezember 1994 zu Phuket versammelt hat.