Audio tour Берасце: украінскія гісторыі. Вялікі тур

Брэст мае доўгую, разнастайную і шалёна цікавую гісторыю. Спакон веку тут жылі людзі розных моў і культур. Прапануем вашай увазе тур па мясцінах, звязаных з жыццём украінцаў Берасцейшчыны.

Украінская гісторыя Берасця надзвычай насычаная, але і незвычай драматычная, поўная выразных знакаў, сплеценая з найвыразнейшых лёсаў і яркіх падзей, такіх як заключэнне Берасцейскага міру, прыняцце Берасцейскай Уніі, выданне Берасцейскай Бібліі Мікалая Радзівіла, праўленне Уладзіміра Васількавіча і росквіт сярэднявечнага Берасця ў складзе Галіцка-Валынскага княства, фантастычнай сілы ўсплёск украінскай культуры ў 1920-30-я гады на фоне жорсткай антыўкраінскай палітыкі тагачаснай Польшчы...

Гэта і зусім мала вядомая ў кантэксце гісторыі Берасця дзейнасць украінскага антынацысцкага падполля.

І адраджэнне ўкраінскага руху ў часы Савецкага Саюза і ў 90-я гады.

І напісанне феміністычнай украінскай "Азбукі жаночага руху"... 

Пункты гіда арганізаваныя ў такім парадку, каб іх зручна было наведваць на аўто. У выніку атрымаецца такое кола па горадзе. Але ясна, што за раз увесь шлях не праедзеш. Ды і маршрут гэты досыць умоўны. Бо ў першую чаргу, наш гід разлічаны на шматлікія самастойныя прагулкі — пешкі, на ровары, самакаце і машыне. Наведваць пункты можна ў любым зручным парадку. Тым больш, у тэксце кожнага пункта гіда вы знойдзеце адсылкі да іншых пунктаў, каб удакладніць або паглыбіцца ў сумежную тэму.

Наш гід змяшчае 80 пунктаў і ўсё ж не прэтэндуе на паўнату. Але гэта першая спроба прадставіць некаторыя рысы, некаторыя фарбы ўкраінскага жыцця Брэста. Таксама запрашаем вас на асобную прагулку па цэнтры горада і пешаходны тур па Брэсцкай крэпасці.

У гісторыі Брэста вялікі ўдзел прымалі як мясцовыя (карэнныя, аўтахтонныя) украінцы, так і прыезджыя.

Часам узнікае пытанне: хто такія аўтахтонныя ўкраінцы Берасцейшчыны? Калі ў нашым рэгіёне (Беларусь і Украіна) адбывалася фарміраванне нацыянальнай самасвядомасці, многія жыхары Берасцейшчыны ўсвядомілі, што гавораць па-ўкраінску і ўспрынялі ўкраінскую нацыянальную ідэю. У 1897 годзе падчас перапісу больш за 80% насельніцтва Брэстчыны назвалі ўкраінскую мову роднай мовай. У 1910-я гады гэтыя людзі наведвалі ўкраінска-польскі тэатр у Брэсцкай крэпасці, а ў 1920-я адкрылі ў Брэсце ўкраінскую школу і ўкраінскі банк. Многія з іх сталі героямі гэтага гіда.

У 1918-пачатку 1919 гадоў Берасцейшчына ўваходзіла ў склад Украінскай Народнай Рэспублікі. І калі на ўкраінскія землі прыйшлі бальшавікі, у Брэсце, які ў той час ужо належаў Польшчы, пасяліліся многія эмігранты з УНР. Пра некаторых з іх вы таксама даведаецеся з гіда.

Таксама вы сустрэнеце тут сусветнавядомых герояў украінскай гісторыі, такіх як Леся Украінка і Тарас Шаўчэнка, танцоры Серж Ліфар і Васіль Аўраменка, Раман Шухевіч і Сцяпан Бандэра, аўтар гімна "Ще не вмерла Україна" Паўло Чубінскі...