Museum Музей "Беларуская хатка"

Шаноўныя сябры, мемарыяльны музей Максіма Багдановіча Беларуская хатка" знаходзіцца амаль у цэнтры горада па вуліцы Рабкораўскай,. Назва яго ўзнікла зусім не выпадкова. Так называўся клуб менскай інтэлігенцыі пачатку ХХ стагоддзя, сябрам якога быў таленавіты творца – паэт, празаік, публіцыст і перакладчык Максім Багдановіч. Гэты будынак – сімвалічны штрых у перадапошнім крутабегу яго жыцця: сустрэчы і развітанні з Беларуссю. Менавіта тут выпала жыць паэту. Сёння – гэта адзінае ацалелае месца ў Мінску па-сапраўднаму звязанае з класікам беларускай літаратуры.

Назва музея нарадзілася ў памяць пра аднайменны клуб інтэлігенцыі, чыннікам якога быў не толькі Максім Багдановіч, але і іншыя дзеячы беларускай літаратуры і гісторыі, сябры паэта. Стваралася “Беларуская хатка”, як філіял Літаратурнага музея Максіма Багдановіча, у канцы 80-х – пач.90-х гадоў мінулага стагоддзя. адчынілася 25 чэрвеня 1991 года. Цяпер гэта філіял Установы “Дзяржаўны музей гісторыі беларускай літаратуры”.

У доме разгорнута экспазіцыя, прысвечаная менскаму перыяду жыцця і творчасці Максіма Багдановіча, а таксама дзейнасці Беларускага таварыства дапамогі ахвярам першай сусветнай вайны, яго актыўным асобам і жыхарам дома Савы Рэдзькі.